UK-ah ni 3 chhung hri kai thar 10,000 chuang awm ziah

Britain ramah Covid hri inkai darh awlsam tak, Delta Variant a darh leh mek avangin ni thum chhung hri kai thar 10,000 chuang hmuhchhuah an awm ziah a, hri kai thar zinga 79% chuan Delta Variant hi an kai a ni.

Inrinni liam ta khan corona­virus kai thar mi 10,321 an awm belh leh a, Inrinni thleng khan ramchhungah hri kai 46,20,968 hmuhchhuah an ni tawh tih official-te chuan an puang.

Hemi ni vek hian corona­virus kaihhnawih vangin mi 14 an thih belh leh bawk. Britain ramah coronavirus vanga thi 1,27,970 an awm tawh.

Britain-a hri kai thar zingah kum naupang lam an tam hle. Hei vang hian thuneitute chuan kum 18 chinte chu vaccine la ngei turin an sawm.

Hri kai thar zingah hian damdawi-in panpui ngai pawh a letin an pung bawk. An zinga a tam zawk chu vaccine la la lo an ni.

Public Health England data tihchhuah aṭanga a lan danin AstraZeneca vaccine dose hnihna la tawhte zingah Delta variant kai damdawi panpui ngai lo chu 92% niin, Pfizer vaccine dose hnih la chu 96% an tling thung.

Britain mipui maktaduai 42.6 in vaccine dose khatna an la tawh a, dose hnihna nena la kim tawh hi maktaduai 31 chuang an awm tawh bawk niin official-te chuan an sawi.