Iran President thar atan Raisi thlang tling

Iran President thar thlanna neih zawh takah judiciary chief Ebrahim Raisi chu thlan tlin a ni a, vote tla aṭangin 60% chuang a hmu.

Interior minister Abdolreza Rahmani Fazli chuan Inrinni liam ta khan press confernce neiin, President thar atan Raisi thlan tlin a nih thu hi a puang. "Ebraham Raisi hian vote 1,79,26,345 a hmu a, kan ram mipuite chuan President thar atan, an aiawhtu atan an thlang tling a ni," a ti.

Inthlanah hian vote a tla chhe hle a, vote tla hi 48.8% chauh a tling pha a ni.

President kalchhuak tur, Hassan Rouhani chuan President atana thlan thar, Raisi hi a office-ah tlawhin lawmpuina a hlan nghal a, "August 4 aṭangin Raisi hi kan ram president a ni dawn a, a kaihhruai sorkar chu ram mipuite chuan theihtawpin kan thawhpui zel dawn a ni," tiin a sawi.