China-ah Covid-19 kai an tlem zel Ram dangte puih nan USD mtd 20 a thawh

World Health Orga­nization (WHO) Director-General Tedros Adhanom Ghebreyesus chuan China ramah Covid-19 kai chu a ni tela a tlakhniam thu a sawi.

China-ah hian he hri vanga thi hi Pathianni leh Thawhṭanni khan tumah an awm lo a, a hmaa he hri kai thar pung hnem ṭhin lutuk pawh a ziaawm tak zel avangin Tedros chuan heng thu hriat hi a lawmawm takzet tih a sawi. "China-in he hri leng do dan a thiam vat hi chanchin lawmawm tak a tling a, ram dangte pawhin China tihdan an entawn a ngai. He hri dona kawngah leh invenna kawngah China chuan ram dangte a tiphur a ni," tiin Tedros chuan thu lawmawm lam hriat a ni chu lawmawm a ti hle a ni.

January thla khan WHO hruaitute leh China-a thuneitute chuan Wuhan-a Covid-19 darh belh zel tur do letna  kawnga thawk ho turin inremna an siam a ni. Theihtawp chhuaha WHO leh China hruaituten an beihna avangin China-a he hri leng hi a ziaawm thei ta a ni. Ambassador Chen Hai chuan an rama Covid-19 ziaawm theihna chhan hi hruaitute thawhrimna zar a nih thu sawiin, khawvel chu he hri beihna kawnga an ṭanrual thu leh ṭanrualna avanga China dinhmun chu ziaawm chho niin a sawi ve bawk.

Chen hian Covid-19 do nan WHO-ah US dollar maktaduai 20 chu China-in a thawh thu a sawi a, China chuan ramdangte puih a huam thu a sawi. "Tun hi thla­bar leh manganna hun a ni lo a, thubelhchian dawl lo hnawl a, inlung­rual taka inpum­khatna hun a ni," tiin Chen chuan Covid-19 beih­na kawnga ram hrang hrangte thawh hona pawimawih zia a sawi a ni. Covid-19 darh ṭanna, China-a Hubei province-a Wuhan City-ah chuan hri kaite enkawlna tura damdawi an neih sa bakah temporary hospital 16 an siamte chu Thawhlehni khan khar kim an ni ta. Temporary hospital 16 an siamah hian February 5 aṭagin khan dam lo 13,000 an enkawl hman a, Thawhlehni tlai khan dam lo enkawl damte chhuahtir kim an ni ta a ni. Report tihchhuah thar berah Covid-19 hi ram 119-ah a darh tawh a, he hri kai zawng zawng hi mi 119,248 an awm tawh a, mi 4,300-in an thih phah tawh. He natna kai dam chhuak leh hi mi 66,581 an awm tawh bawk.