Myanmar danpui siamṭhat tumna tlang lo

Myanmar Parliament-a an ram danpui siamṭhatna tur, Parliament seat-a sipai chanpual neih zat tihtlemna tura rawtna lut chu a tlang zo lo. 

Parliament-ah hian danpui siamṭhat rawtna chung­­chang hi ngaihtuahin vote lak a ni. He rawtna hi MP tam zawkin thlawpin, danpui siamṭhat duh lamah MP 633 zinga 404 in an vote a, mahse tlang tura vote hmuh ngai zat 75% erawh a hmu pha ta lo a ni. 

Nimin khan ram dang mi nupui pasal neiten an ram President dinhmun an chelh theih lohna dan siam pawh sawiho a ni leh bawk. Danpui siamṭhat rawtna hrang hrangte hi March 20 thleng  ngaihtuah chhunzawm a ni ang. 

Rorellai National League for Democracy (NLD) hruaitu, Aung San Suu Kyi pawh a pasal British a nih avangin sorkarna an siam hnuah pawh President dinhmun a chelh thei lo a ni. Hei vang hian State Counsellor ah dah a ni.