US leh Afghanistan President-te inhmu dawn
United States president Joe Biden chuan Zirtawpni hian White House-ah Afghanistan president Ashraf Ghani leh Afghanistan High Council for National Reconciliation chairman, Abdullah Abdullah-te a hmu dawn.
White House-a an meeting-ah hian Afghanistan aṭanga US sipaite lakkir chungchang leh, Afghanistan sipai leh Taliban firfiakte inkarah inbeihna hluar chho zel chungchangte an sawiho ang.
President pahnihte hi hmaichhana an inkawm ṭum khatna tur a ni a, Biden chuan Afghan mipuite nena inkungkaihna ṭha neih, ei leh bar kawnga hmasawnna leh an ram miretheite chhawdawl kawngah US chuan a theih anga puih zel a inhuam thu Ghani leh Abdullah-te hi a hrilh nghal dawn tih White House chuan a tarlang.
White House chuan, "President Ghani leh Dr.Abdullah lo kal tur hian sipaite lakchhuah an nih mek karah United States leh Afghanistan inkara thawhdunna ṭha a awm chhunzawm zel zia a tilang a ni," a ti.
Biden-a'n September 11 hmaa US sipaite lakchhuah vekna tur thutlukna a siam hnuah, Afghanistan-ah Taliban firfiakte an che hluar chho leh hle a, district 30 vel an la tawh a ni. US hian May 1 aṭang khan America sipai awmte chu lachhuak ṭanin, an base ṭhenkhat pawh kharin Afghanistan sorkar kutah an hlan tawh bawk.
Hetih lai hian Taliban chuan Aghanistan hruaituten US an tlawh tur hi thil ṭangkai lo niin a sawi. Taliban thupuangtu Zabihullah Mujahid chuan, "Ghani leh Abdullah hian an thuneihna leh duhzawngte an hum theihna turin US official-te biak an tum zawk a ni. Afghanistan tan hlawkna tur a awm lo," a ti.
President Ghani office lam chuan thuchhuah engmah an la siam lo a, mahse official-te chuan Afghanistan President hian America sipaite lakchhuah an nih hnuah pawh US lak aṭang hian Afghan sipaite ṭanpui chhunzawm zel turin a ngen dawn niin an sawi.