Netanyahu-a'n July 10 hmain PM chenna chhuahsan dawn

Israel prime minister hlui, opposition hruaitu ni ta Benjamin Netanyahu leh a chhungte chuan prime minister official residence chu July 10 hmain an chhuahsan dawn.

Kum hnih chhunga Israel ram inthlanpui ṭum li neih a nih hnuah, tun thla tir lam khan prime minister thar Naftali Bennett leh foreign minister Yair Lapid-te chuan ṭangrual sorkar thar an din a, Netanyahu chu prime minister a nihna aṭangin paihthlak a ni ta a ni. Netanyahu hi kum 12 chhung Israel prime minister niin, PM ni rei thei ber a ni.

PM thar Bennett kaihhruai ṭangrual sorkar hi kar hmasa khan lakluh ni tawh mah se, Jerusalem-a PM official residence-ah Netanyahu-te chhungkua hi an la khawsa a ni.

Bennett leh Netanyahu office-te chuan Inrinni khan thuchhuah inṭawm siamin, Netanyahu leh a chhungte hian PM chenna chu July 10 ral hma ngeia chhuahsan turin an inrem tih an sawi. Hemi hnu hian Prime Minister Bennett-te chu an insuan lut ve nghal ang.

Netanyahu hian party hrang pariat telna, ṭangrual sorkar thar chu leftist sorkar hlauhawm tak, Israel security tana him lo niin a sawi a, sorkar thar hi paihthlak a tum thu pawh a sawi fo tawh a ni.