Myanmar aṭangin mi 10,000 chuang tlanchhe tawh

UN Secretary-General special envoy on Myanmar Christine Schraner Burgener chuan Myanmar aṭangin 10,000 chuang chu India leh Thailand ramah an tlanchhe tawh niin a sawi.

UN General Assembly-ah he thu hi sawiin, Burgener chuan Myanmar mipuite chuan dinhmun hrehawm takah awm mekin, beisei nei lo leh hlau thlabar takin an awm mek a ni, a ti.

Sipai rorelna duh lotute chunga sipaite chet danah ram dangten hma an lak loh avangin civil mite chuan defence force an din a, an siamchawp ralthuamte hmangin, helpawl hnen aṭangin training-te an la a ni, tiin Burgener chuan a sawi. Ram chhung hmun ṭhenkhat, kum tam tak inbeihna thlen ngai lohna hmun pawh a buai chho mek thu a sawi a ni.

Ram chhung hmun hrang hrang, a bikin China, India leh Thailand ramri bulah inbeihna a thlen fo avangin mi tam tak himna zawngin an tlanchhe tawh a, Myanmar tualchhung buaina thleng mek chuan tualchhung indona, civil war nasa tak a thlen chhoh mai hlauhthawnawm a ni, tiin a sawi.

Burgener chuan Myanmar mipuite chuan harsatna leh buaina hrang hrang an tawk a, mipuite ṭanpui tura hma lak thuai a ṭul thu UN General Assembly-ah a sawi a ni.