Afghanistan-in Taliban jail tangte chhuah dawn

Afghanistan official-te chuan thuchhuah siamin, an ramin Taliban firfiak an man jail tang mi 1,500-te chu March 14-ah an chhuah ṭan dawn tih an tarlang. 

Thla hluia US leh Taliban-ten inremna an siam hnua jail tang chhuah leh chhuah loh tur chungchanga Taliban-te leh Afghanistan sorkarte an inrem lawk theih loh hnuah, inremna kawng zawngin nimin khan Af­ghanistan president Mo­hammad Ashraf Ghani chuan tangte chhuahna thupek hi a ziak ta a ni. 

President thupek siam angin Taliban firfiak an man mi 5,000-te chu a tahtawla chhuah tura tih an ni ta a ni. Heng jail tang chhuah hmasak tura tih mi 1,500-te hi March 14 aṭanga chhuah ṭan tura tih an ni a, nitin mi 100 zela chhuah tur an ni. An kum, hriselna dinhmun leh kum engzat nge jail tan hun chhung an la neih tihte enfiah vek an ni dawn a, biometric registration kaltlanga chhuah vek tur an ni bawk.

 

Afghanistan sorkar leh Taliban inkar hi boruak hi a ṭhat chho zel chuan kar hnih danah jail tang dang mi 3,500 la awm aṭangin mi 500 chhuah zel tura tih a ni bawk ang tiin President Ghani-a thupek tihchhuah chuan a tarlang.