Islamabad khawpuiah Pakistan Air Force thlawhtheihna a tla

Pakistan Air Force F-16 fighter jet chu nimin zing khan Islamabad khawpuiah a tla a, pilot a thi.  

Air Force thu­puangtu chuan US siam, F-16 hi March 23-a Pakistan Day lawmnaa air show leh parade neih tur atana inbuatsaihin, enchhinna an neih laiin parade ground-ah a tla a, a kang zui tih a sawi. Pilot wing commander Noman Akram chu a thi tih a sawi bawk. 

Thlawhtheihna tlakna hmunah hian chhanchhuah hna thawktute tirh nghal an ni. A tlakna hmunah hian thil chhia lian tham leh mitthi dang an awm lo nia sawi a ni. Air Force pawhin a chetsual dan hi chhui chiang turin thupek a tichhuak nghal bawk. F-16 fighter jet hi Pakistan hian 50 vel a nei a, pakhat hi US dollar maktaduai 40 man a ni. Pakistan president Afif Alvi chuan chetsualna thleng chu pawi a tih thu leh, pilot Noman Akram chhungte a tawrhpui thu a sawi.