Malaysia sorkar fiahna put luh tum ṭhulh

Malaysia prime minister aṭanga bang ta, Mahathir Mo­hamad chuan Parliament-a Prime Minister thar Muhyiddin Yassin kaihhruai sorkar tharin thlawptu a ngah tawk lo tia fiahna put luh a tum chu a ṭhulh. 

Mahathir Mohamad-a'n PM aṭanga banna a thehluh hnuah, Malaysia lal chuan February 29 khan Muhyiddin hi PM thar atana ruat a ni. Mahathir chuan PM thar hian sorkar thar siam turin Parliament member thlawptu a ngah tawk lo niin a sawi a, sorkar fiahna tur motion hi putluh a tum tih a sawi a ni. Mahse nimin khan a thu hi sutin, Mahathir chuan amah thlawptu member ṭhenkhat chu Muhyiddin hian a laksak ṭhen tawh avangin, Parliament-a vote lakah pawh fiahna a paltlang thei tawh dawn niin a sawi. 

Kum 94 mi, Mahathir hi kum 1981-2003 khan Malaysia prime minister niin, kum 2018 May thlaa inthlanpuiah khan a kaihhruai ṭangrual dingin, PM a ni zui leh a ni. Mahse ṭang­rual sorkar a siampui ṭhen­khatte chuan eptu party-te nen thawkhoin paihthlak an tum a, hei vang hian February 24 khan PM a nihna aṭangin banna a thehlut a ni. Banna a thehluh hnuah ṭangrual sorkar thar a siam leh thei tih a sawi a, mahse an ram lal chuan PM atan Muhyiddin a ruat ta zawk a ni.