'Vaccine lak nge jail tan?' : President Duterte

Philippine president Rodrigo Duterte chuan an ram mipuite chu coronavirus vaccine la vek tura hrilhin, vaccine la lote chu jail-a khungah a vau.

Philippine ramah hian Covid Delta variant vangin hri kai an pung thar leh a, hei vang hian sorkar pawhin ramriahte khuahkhirhna a ti khauh leh tawh a ni.

Kumin March thla aṭang khan Philippine ramah hian vaccine pek chhuah ṭan ni mah se centre hrang hrangah vaccine la hi an tlem thei hle nia sawi a ni. Hei vang hian President Duterte chuan Thawhṭanni zana thu a sawiah, "Duh in thlang thei ang, vaccine lak nge jail-a tan in duh zawk?" tin an ram mipuite hrilhin, vaccine la duh lote chu vawk damdawi hmanga chiuah a vau zui bawk.

Duterte hian a hma pawhin hri leng vanga sorkarin khuahkhirhna a siam bawhchhiate chu silaia kahah a lo vau tawh bawk. He thu a sawi hnu hian dan bawhchhiat vanga thuneituten an tihhlum nia sawi eng emaw zat an awm a ni.

Philippine ram mipui maktaduai 110 zingah 1.95% chauh chu vaccine dose la kim an la awm niin vaccine tracker, Herd Immunity PH chuan a tarlang. Mahse sorkar report-ah chuan Thawhṭanni thlenga vaccine vaccine dose hnih la kim tawh chu mi maktaduai 2.15 vel niin a sawi thung. Dose khatna la tawh hi maktaduai 6.2 an awm tawh tih a sawi bawk.

Thawṭanni thleng khan Philippine ramah hian hri kai hmuh chhuah mi maktaduai 1.3 an awm tawh a, active case hi 56,000 vel an la awm bawk. Hri kai zinga 23,700 in an thihpui tawh bawk.

President Duterte chuan Covid vaccine la duh lote chu an ram chhuahsan a, India emaw US-ah emaw kal mai turin a ti bawk a ni. Hri darh zel tur venna atan hian Philippine sorkar chuan June 30 thleng India, Pakistan, Nepal, Bangladesh, Sri Lanka, Oman leh United Arab Emirates aṭanga luh a khap.