Myanmar sipaite leh tualchhung sipaite inbei

Myanmar sipaite leh tunhnaia tualchhung sipai pawl din tharte chu Thawhlehni khan an ram khawpui lian ber dawttu, Mandalay-ah an inbei tih media-te chuan an tarlang.

February 1-a sipaiten civil sorkar thuneihna hnehchhuh a, Aung San Suu Kyi kaihhruai sorkar an paihthlak hnu aṭang khan sipaite chuan anmahni dodaltute lakah ralthuam an chelek nasa ṭhin hle. Hei vang hian sipai rorelna dodaltu pawlte chuan sipaite do let tur hian ṭangrual pawl, people's defence force an din a ni.

Sipai leh tualchhung helpawl inbeihna te hi khawpawn leh thingtlang hmunah a thleng deuh ber ṭhin a, mahse Mandalay-a People's Defence Force member-te chuan sipaite hian khawpuia an hmunpui pakhat an beih avangin an bei let ve tih an sawi.

Sipaite hian motor pathum nen chuan PDF-ten camp an siamna, Mandalay boarding school chu an hual niin Khit Thit news chuan a puang.

Sipaite hian hmun dangah pawh anmahni dodaltute chu laipui leh thlawhtheihna hmangin a bei let bawk a, heng inbeihna thlengah hian mi tam tak an hliam a, sahimna zawnga tlanchhia pawh sang tel an awm bawk.

United Nations General Assembly chuan Zirtawpni khan Myanmar-a buaina chhuak mek chu titawp a, sipaite chu nikum November thlaa an rama inthlanpui result chu zahsak tur leh Suu Kyi chhuah zalen turin a ngen.

Mahse Myanmar foreign ministry chuan UN thuchhuah siam chu ṭan lam nei leh ngaihruatna diklo tiin UN resolution siam chu an hnawlsak tih a sawi.