Israel-in Gaza aṭanga bungrua thawnchhuah phalsak

Israel chuan Gaza Strip-a rorellai, Palestinian pawl Hamas nena inkahhai an puan aṭanga thla khat ral hnuah, Thawhṭanni aṭang khan Gaza Strip aṭangin bungrua ṭhenkhat thawnchhuah a phalsak ṭan.

Gaza border official-te sawi danin Israel-in ni hnih-ni thum vel khuahkhirhna hi a thlahdul dawn nia sawiin, hemi chhunga bungraw thawnchhuah phalsak zingah hian agricultural goods leh textile lamte a huam a ni, an ti.

Israel hian May thlaa Hamas-te nena an inbeih hnu aṭang khan ramria khuahkhirhna a siam hi a tikhauh zual a, Gaza aṭang hian bungrua eng chi mah thawnchhuah a phalsak lo a ni. Mahse Egypt hmalaknaa inkahhai an puan hnuah, Thawhṭanni khan khuahkhirhna hi a thlahdul a ni.

"Venhimna uluk taka kalpuia, inkahhai puan a nih hnua a vawi khatnan, ruahmanna ṭha tak siamna hnuaiah Gaza Strip aṭangin agriculture hmanrua thawhchhuah theih a ni ang," tiin Israel Defence Ministry branch, COGAT chuan a sawi.

COGAT chuan ruahmanna siam hi prime minister Naftali Bennett kaihhruai sorkar chuan a pawmpui tih a sawi bawk.

Israel leh Hamas-ten inkahhai an puan hnuah, kar liam ta khan Gaza aṭanga hian Israel lamah balloon alh thlawh luh tir a ni leh a, hei vang hian ram ṭhenkhat pawh a kang niin Israel lam chuan an sawi. Israel sipaite chuan hei hi chhang let nghalin, Hamas hmunte chu thlawhtheihna aṭangin an bomb zui ve nghal a ni. Mahse kar liam ta Zirtawpni aṭang khan an boruak hi a ziaawm chho leh a, hei vang hian Israel pawhin ramria khuahkhirhna a siam pawh a thlahdul ve leh ta a ni. Gaza agriculture ministry chuan Israel-in bungrua thawnchhuah kawnga khuahkhirhna a siam avang hian loneitute chuan US dollar maktaduai 16 hu vel an hloh tawh niin a sawi.