Spain sorkarin Catalan hruaitu 9-te ngaidam

Spain lak aṭanga Catalonia indepen­dence sualtu, Catalan hruaitu pakuate chu Spain sorkar chuan a ngaidam.

Catalan hruaitute hi kum 2017-a Catalonia independence an beihna a hlawhchham hnuah man niin jail-ah an tang mek a ni. Mahse Thawhlehni khan prime minister Pedro Sanchez chuan Catalonia bial nena boruak ṭha siam a ngai tih sawiin, sorkar chuan Catalonia bial leh Spain ram tana ṭha tur nia ngaiin hruaitu tang mekte hi ngaihdam an nih thu a sawi a ni. Mahse ngaihdam ni mah se heng hruaitute hi politics an khelh erawh khap chhunzawm an la ni ang.

Catalan hruaitu ngaihdam zingah hian Catalan vice president hlui Oriol Junqueras pawh a tel a, kum 2019 khan Spain sorkar laka hel leh public fund tichingpena puhin kum 13 tang tura hrem a ni. A dang pariatte hi Catalan sorkara cabinet member hlui, Catalan Parliament speaker hlui leh civil society group hruaitute an ni a, kum 9-12 inkar tang tura hrem tawhte an ni.

Sorkar chuan Catalan hruaitute hi ngaihdam ni mah se, anmahni thlawptute nena Spain aṭanga inlakhran tuma hma an la chhunzawm leh a nih chuan ngaihdam an nihna hi sut leh theih a nih tur thu a sawi.

Hetih lai hian Catalonia bial khawpui, Barcelona-ah Spain aṭanga inlakhran duhte chuan kawng zawhin, PM Sanchez-a'n Catalan hruaitute a ngaihdam dan chu a tawk lo nia sawiin, Spain aṭanga inlakhran duh leh duh loh chungchanga vote lak ṭhat leh an phut. Prime Minister chu Catalan hruaitu dang, ram anga tlanchhe mekte pawh ngaidam turin an phut a, an zingah hian Catalonia president hlui Carles Puigdemont pawh a tel.

Spain sorkarin Catalan hruaitute a ngaidam hi right wing leh left wing party ṭhenkhat chuan na takin an sawisel a, politics khelhna hmanruaa hmangah PM an puh. Far-right Vox Party chuan sorkar thutlukna siam chu Spain mipuite phatsanna a ni tiin, court-ah khin let an tum. Spain mipui ngaihdan lakah pawh a tam zawkin sorkar thutlukna hi an thlawp lo a ni.