Italy-ah mask vuah kher ngai tawh dawn lo
Europe rama hri leng tuar na ber zinga mi, Italy-ah chuan Covid-19 hri lengin ziaawm lam a pan chhoh zel avang leh damdawi-in panpui ngai an tlakhniam zel avangin June 28 aṭangin pawn lamah mask vuah a ngai tawh dawn lo.
Italy sorkar chuan nikum October thlaa hri leng thawh hnihna an tawrh tirh aṭang khan hri darh tur venna kawng khat atan pawn chhuahnaa mask vuah vek turin thupek a lo chhuah tawh a ni.
Prime minister Mario Draghi kaihhruai sorkar chuan April aṭang khan khuahkhirhna thlahdul hret hretin restaurant, bar, cinema leh gym te chu hawn phalna a pe ṭan a, ramchhunga zin veivah pawh an phal tawh bawk. Pawn chhuahnaa mask vuah tura thupek siam chu an kenkawh rei ber a ni.
Mipuite chu inchhunga mipui punkhawmna leh public transport-ahte mask vuah chhunzawm tura tih an la ni dawn thung. Mitinte chu khawilo kalnaah mask pai reng tur te, mipui punkhawmna leh hri inkaichhawn awlsamna hmunah te mask vuah reng turin a chah.
He thupek hi June 28 aṭanga hman ṭan tura tih a ni. Italy-ah hian Covid-19 kai tam dan azirin color pali hmangin zone ṭhen hran a ni a, ramchhunga hmun 20 te chu color him ber white zone huam chhunga dah vek a tum a ni. Tun dinhmunah hian hmun 19 chu white zone huam chhungah an awm tawh.
Hmarlama Valle d’Aosta bial chauh chu hri kai tlemna ber dawttu yellow zone-a la awm chhun a ni.
"June 28 aṭangin white zone a chengte chuan mask an vuah kher a ngai tawh dawn lo," tiin Health Minister Roberto Speranza chuan a sawi. Europe ram dang France leh Spain pawhin mask vuah chungchanga khuahkhirhna siamte chu an lo thlahdul tawh bawk a ni. Hetih lai hian tunhnaiah Europe ramah hian Covid hri chi hran, Delta variant a darh hlauhna a lian hle thung.