Hong Kong-a democracy thlawptu langsar Apple Daily chanchinbu tihtawp a ni ta
Hong Kong-a democracy thlawptu chanchinbu,Apple Daily chanchinbu chhuak hnuhnung ber tur chu tihchhuah a ni a, vawiin aṭang chuan he chanchinbu hi tihtawp a ni tawh ang.
Kum 26 chhung tihchhuah tawh, Apple Daily chuan national security law thar bawhchhiaa puha chanchinbu neitu leh staff ṭhenkhatte man an nih hnu leh, an office-te dap a, an thawhpui company-te hreksak an nih hnuah chanchinbu hi tihtawp a ni dawn tih Nilaini khan an sawi a ni.
Apple Daily hi democracy thlawptu, China leh Hong Kong sorkar pawh huaisen taka sawisel ngamtu a ni. Chanchinbu neitu, Jimmy Lai chu ram dangte thawhpuia puhin nikum August thla khan man a ni a, hemi ṭum hian police 200 velin newsroom office hi an dap bawk. Kar liam ta khan police 500 velin office hi an luhchhuah leh a, executive panga an man. An chanchinbu nena inzawmna nei company-te chu an thil neih khawih chet theih lohin hreksak zui an ni bawk.
Website-ah Apple Daily chuan thawktute himna leh an dinhmun ngaihtuahin chanchinbu tihtawp mai hi an rel tih a tarlang, kum 26 chhung an chanchinbu lo ngaihhlutsaktute chungah lawmthu a sawi bawk a ni.
Paper publisher Next Digital chuan thawktu 600 vel awmna, Apple Daily chu Hong Kong boruak awmdan avangin titawp a ni tih a sawi ve bawk.
Mi tam tak chu nimina Apple Daily chhuak hnuhnung ber lei tumin zing aṭangin an intlar a, an ram huna chawhma dar 10-ah chanchinbu hi an hralh zo vek tawh a ni. Chanchinbu chhuak hnuhnung ber hi copy maktaduat khat an tichhuak a, hei hi nidanga an tihchhuak ṭhin aiin a let 10 zetin a tam. Nilaini zana company-in chanchinbu tihtawp a nih tur thu a puan hnu lawkah pawh anmahni thlawptu mi tam tak chu ruahsur hnuaiah an office kawtah pungkhawmin, an thlawpna an lantir a ni.
Apple Daily hi Hong Kong-a democracy thlawptu chanchinbu lian ber a ni a, China leh Hong Kong sorkar policy leh hruaitute huaisen taka sawisel ngam a ni a, hei vang hian China sorkar pawhin a ngaimawh hle a ni. Official-te chuan kum 2019 aṭang khan he chanchinbuah hian Hong Kong leh China sorkar sawiselna leh, ram dangte hnenah hrek tura ngenna article 30 vel zet an tichhuak tawh niin an sawi.