Kamala Harris-i'n Mexico ramri tlawh dawn

US vice president Kamala Harris chuan vawiin hian Mexico nena an inrina hmun a tlawh dawn tih White House chuan a sawi.

Tun hnaiah central America rama retheihna leh tharum thawhna tlansan tum mi sang tel chuan United States border hi an luttlang ṭhin a ni. Republican lam chuan President Joe Biden kaihhruai sorkar chu an ramri kaltlanga lut an pung zel chunga enfiah ṭha tawk lo leh, buaina pumpelh duh vang chauha a hminga hma la ah an puh. Hei vang hian Vice President pawh hian Mexico ramri hi enfiah turin tlawh a tum a ni.

Vice President hian ramri bul khawpui, El Paso, Texas chu tlawhin, homeland security secretary Alejandro Mayorkas chuan a ṭawimawm dawn tih Harris senior advisor Symone Sanders chuan a sawi.

President Biden hian kumtir khan El Salvador, Guatemala leh Honduras aṭanga pem lut tam lutuk sutkian a nih theihna atan hmala turin Harris hi a hrilh a, Vice President hian tun thla tir lam khan Guatemala leh Mexico-te a tlawh a ni. Mahse a zin chhuahnaah hian ramri-ah thil awmdan thlithlai tura a chawlh miah loh avangin sawisel zui erawh a hlawh hle.

US President hlui Donald Trump chuan June 30 hian Mexico ramri hi tlawh a tum bawk. Trump chuan, "Chhim lama ramria buaina chu thla tam tak ngaihthah an ni tawh. Border policy khauh tak ka lo siam tawh Biden-a'n a tihtawpin a rah chhuah, chhiatna nasa tak leh thihna thlen dante Kamala Harris-i'n a va hmu tur hi a ṭha hle a ni," a ti.