Sri Lanka President-in tang 93 a ngaidam

Sri Lanka sorkar chuan president Gotabaya Rajapaksa-a'n tang 93 a ngaihdamte chu nimin khan a chhuah a, an zingah hian LTTE firfiak nia rinhlelh mi 16 an tel.

Sri Lanka rama Buddhist sakhua a luh champha, Poson Poyo pualin President Rajapaksa chuan tangte hi a ngaidam a ni. President-te hian Buddhist-te ni pawimawh hi mi tangte ngaihdamna ni atan an lo hmang fo tawh ṭhin.

President-in a ngaihdam zinga Liberation Tigers of Tamil Eelam (LTTE) firfiak pawl mi leh sa nia sawi, mi 16-te hi Prevention of Terrorism Act (PTA) hnuaia man an ni a, hmarlama Jaffna leh Anuradhapura khuaa jail-ah dah an ni.

Hetih lai hian Tamil party, Tamil National Alliance (TNA) leh rights group hrang hrangte chuan kum 10 chuang thubuai siamsak loa hren tawh, politics thil vanga Tamil mi mante chu chhuah turin sorkar an nawr ve mek bawk. TNA hian politics vanga man, Tamil mi hi 100 dawn an la awm niin a sawi a, mahse Sri Lanka sorkar chuan jail-ah political prisoner an awm lo tih a sawi thung.