Colombia President chuanna helicopter beitu man ngei tum
Colombia sorkar chuan an ram president Iván Duque chuanna helicopter beitu chinchang hrilh thei hnenah pesos maktaduai thum ($7,96,000) pek a tiam.
President Duque chuanna helicopter hi Zirtawpni liamta khan Venezuela inrina bula Cúcuta airport a thlen hmain silaia kah a ni a, mahse helicopter-a chuang zingah hian thi leh hliam an awm lo a ni. United Nations, European Union leh United States-te chuan he thil thleng hi an dem thu an sawi.
President bula chuang ve, defence minister Diego Molano chuan pawikhawihtute hi man an nih ngei theihnan an chanchin hrilh thei hnenah lawmman pek an tiam tih a sawi a ni.
Police te chuan Cúcuta-ah hian AK-47 leh 7.62 calibre rifle an chhar a, President beihna atana hman ni ngeia an rin thu an sawi. 7.62 calibre rifle-ah hian Armed Forces of Venezuela chhinchhiahna a awm bawk.
National police chief General Jorge Vargas chuan pawikhawihtute hi hriat an la ni lo a, mahse an man chhuak ngei dawn tih a sawi.
Inkahna thlen hma hian Duque hian Colombia leh Venezuela inrina bul, Catatumbo region a tlawh a ni. Colombia hian Venezuela chu tunhma aṭanga hel venghim ṭhinah puhin, Venezuela erawh chuan a pha thung. Duque-an 2018 a thuneihna a chan aṭang khan an inlaichinna pawh chhutchah vek a ni.