Suu Kyi thubuai ngaihtuah chhung tirei dawn

Myanmar ram hruaitu, Aung San Suu Kyi-i lawyer Khin Maung Zaw chuan Suu Kyi thubuai siamsakah sipai lamten thuhretu dang koh belh zel an la tum avangin a thubuai ngaihtuah hun hi ruahman lawk aiin a rei dawn tih a sawi.

Suu Kyi hi civil sorkar paihthlak a nih hnuah, sipaten pawn chhuak thei loin a inah an hreng mek a ni. Hrenbeh a nih hnu hian thubuai eng emaw zat siamsak a ni tawh bawk a, a legal team chuan heng thubuaite hi July thla tawpah chuan chinfel hman an beisei thu an lo sawi tawh a ni.

Mahse thubuai siamsaktu lam thuhretu 23 koh belh leh an tum avangin an beisei ang hunah thubuai hi chinfel hman a ni dawn ta lo niin a lawyer chuan a sawi.

Suu Kyi hi man a nih hnu hian a legal team hmu tur leh, court-a a inlan tur tih lohah chuan pawn lamah a chhuah phalsak a ni lo. Thawhṭanni khan an ram khawpui, Nay Pyi Taw-a special tribunal-ah inlanin, hemi ṭum hian sipai lam hian thuhretu pali an ko a ni. Thubuai hrang hrang siamsak zingah kum 2020 inthlanpui an neih laia hri leng laka invenna tura kaihhruaina siam palzuta puhna te, dan loa ram pawn aṭanga walkie talkie lalut leh kawla puhna pawh a tel. Hei bakah hian colonial-era secrecy law bawhchhia leh dan loa rangkachak dawnga puhna thubuai pawh a nei mek bawk. Heng a thubuai hrang hrangah hian thiam loh chantir a nih chuan kum 10 chuang jail tang tura hrem theih a ni dawn a ni.

Thawhṭannia court-a a inlan hian Suu Kyi-i hi a harhvangin a hriselna pawh a ṭhat hmel niin a lang a, hemi ni vek hian president hlui Win Myint pawh coronovirus regulation bawhchhiaa puhna thubuai pawh ngaihtuah a ni nghal bawk. Thubuai ngaihtuahnaah hian journalist-te an tel phalsak an ni lo.