NKorea mipuiten an ram hruaitu hriselna ngaihtuah

North Korea mipuite chuan tunhnaia an ram hruaitu, Kim Jong-un thlalak tihchhuahah tunhma lam aia a cher tak viau vangin a hriselna dinhmun an ngaihtuah hle.

Tun thla tir lama video footage tihchhuahah kum 37 mi, Kim hi a lang cherin a chak loh hmel viau a, hei hi ram mipuite rilru a ti na hle tih an sawi. Hetih lai hian Kim cher chhan te, a hriselna dinhmun dik tak erawh hriat chian theih a ni lo thung.

State broadcaster KRT chuan Pyongyang-a cheng mi pakhat thusawi chu tichhuakin, an ram mipui zawng zawngte chuan an hruaitu dinhmun hi an ngaihtuah hle tih a sawi.

Nikum April thla khan Kim hi NKorea founder, Kim Il Sung piancham lawmnaah a tel loh avangin a hriselna a tha tawk lo nia sawi a lo awm tawh a, mahse a hriselna chungchang hi sorkar lam chuan engmah a sawichhuak ngai lo a, hei vang hian a dinhmun hi hriat chian theih a ni lo.