Ethiopia sorkarin inkahhai puang

Ethiopia sorkar chuan an ram hmarlama Tigray biala helpawl nen thla riat dawn an inbeih hnuah Thawhṭanni khan inkahhai a puang.

Tigray bialah hian sorkar sipai leh Tigray People’s Liberation Front (TPLF)-te chu hun rei tak inbeiin, helpawl hian he bial khawpui, Mekelle chu sipaite kut aṭangin Thawhṭanni khan an laksak a, hemi hnu hian sorkar chuan inkahhai puan hi a remti ta a ni.

United Nations chuan Tigray biala hun rei tak inbeihna thleng vang hian mi nuai 3.5 vel chu ei leh in tur an tlachham ṭan tawh a, ṭam mai hmabakin an awm mek tih a sawi.

TPLF thupuangtu, Getachew Reda chuan, "Tigray khawpui, Mekelle chu kan kutah a awm ta e," tiin khawpui chhunga cheng mi tam tak chuan kawtthlerah halmawite halin an lawm zui a ni.

Helhoin Mekelle khawpui an lak hnu hian Ethiopia sorkarin Tigray biala roreltu atana a dahte chu an tlanchhe zui a, khawpui chhunga chengte chhawmdawlna pek an nih theihna turin inremna siam an duh thu an sawi nghal bawk. Hemi hnu, Thawhṭanni zan khan sorkar chuan inkahhai an puan thu leh, hei hian thlai chin leh tharchhuah hun chhung a huam phawt tur thu an sawi.

Ethiopia prime minister Abiy Ahmed chuan TPLF-te hian army camp-te an bei ṭhin nia sawiin, nikum November thla tir lam aṭang k han Tigray bialah hian sipaite chu khawmual leh boruak aṭangin beihpui a thlak tir a ni. Nikum November thla tawp lam khan sipaite hian Mekelle khawpui hi lutin, PM Abiy chuan hnehna an chan thu a puang zui bawk. Mahse hemi hnu pawh hian sipai leh TPLF-te hi an inbei chhunzawm reng a ni. Inbeihna thleng vanga civil mi thi zat hi hriat chian a ni lo a, mi sang tel erawh an tling nia sawi a ni a, mi maktaduai hnih vel chu hmun him lamah an tlanchhe bawk.