Biden leh Israel President inkawm
U.S. President Joe Biden chuan Thawhṭanni khan an ram tlawhtu, Israel president Reuben Revlin chu White House-ah kawmin, ram pahnihte inlaichinnate an sawi dun.
Oval office-a ram pahnih hruaitute inkawmnaah hian, US President Biden chuan Israel-in a ram venhimna tura a hmalaknaah theihtawpa an thlawp zel tur thu sawiin, a awm chhung chuan Iran-in nuclear ralthuam a neih a remti dawn lo tih a sawi.
Biden chuan Israel prime minister thar Naftali Bennett pawh White House-ah a hmuh thuai tur thu a sawi a, Israel leh a chhehvela ram dangten thawhhona ṭha an neih a duh thu a sawi bawk.
Israel president Rivlin hi July thla hian a President term zoin a chawl tawh dawn a ni. Israel president te hi ram kaih hruai kawngah thuneihna an nei mang lo a, term khat hi kum sarih chhung niin, term khat aia rei an chelh thei lo thung a ni
UAE-ah Israel FM zin
Israel foreign minister Yair Lapid pawh nimin khan United Arab Emirates (UAE) ah a zin a, Israel minister ni tawh zingah official-a UAE tlawh hmasa ber a ni.
Minister hi ni hnih a cham dawn a, Abu Dhabi-a Israel embassy leh Dubai-a consulate siam a hawng nghal ang. UAE foreign minister Abdullah bin Zayed Al Nahyan nen inkawmin, ram pahnihte inlaichinna neih hrang hrangte sawiin, thawhdunna ṭha leh zau zawk an neih theih dan turte an sawidun ang.
Nikum August thla khan Israel PM hlui Benjamin Netanyahu kaihhruai sorkar chuan UAE nen hian thawhdunna tur inremna an lo siam tawh a ni.