Myanmar sipaiten tang 2,000 an chhuah dawn

Myanmar sipai hotute chuan ramchhung jail hrang hranga tang mek zinga mi 2,000 an chhuah zalen dawn tih Nilaini khan an puang. Sipai sorkar dodalna lantir avanga man, actor leh celebrity-te laka thubuai siamte pawh tihtawpsak an ni bawk.

Prison chief Zaw Zaw Yangon chuan tang chhuah tur zingah hian Insein jail-a tang mek, 700 vel an tel dawn niin a sawi. Mahse tute nge chhuah tur tih erawh a sawichiang duh lo thung. Insein Jail-ah hian civil sorkar paihthlak leh sipai rorelna duh lohna lantirtu zinga man ṭhahnem tak tan tir an ni.

Tangte hi Inrinni atang hian chhuah ṭan an ni dawn nia sawi thawm a awm a, hei vang hian tang chhungte chu an lainate hmuak turin jail pawnah an awmkhawm ṭan tawh a ni. Nimin pawh khan mi za tel chu Insein jail pawn lamah an pungkhawm a ni.

April thla khan sipai sorkar chuan an kum thar lawmna pualin ram chhung hmun hrang hranga tang 23,000 chuang ngaidamin a lo chhuahtir tawh. Mahse hemi ṭuma tang chhuahtir zingah hian February 1-a sipaiten civil sorkar an paihthlak duh lohna lantir vanga man chu tlemte chauh an tel thung.

Sipai sorkar dodalna lantirna thlawptu, an ram mi lar 24-te laka thubuai siamsak chu sipai sorkar chuan a tihtawp sak hnuah, tang chhuah an nih tur thu hi a puang zui leh a ni. Anni bakah hian actor, sportspeople, social media influencer, doctor leh ziritrtu eng emaw manna tur thupek a tichhuak bawk. Heng zingah hian singer Lin Lin leh Chit Thu Wai, actor - Phway Phway, Eaindra Kyaw Zin leh Pyay Ti Oo-te bakah model May Myat Noe an tel. Myanmar chauh ni lo, Thailand ram lamah pawh lar tak, actor leh model Paing Takhon chu April thla khan man a ni a, actor Pyay Ti Oo leh a nupui Eaindra Kyaw Zin-te chu police-te kutah an inpe tawh bawk.

Sipai enkawl television channel, Myawaddy chuan celebrity 24-te thubuai tihtawp sak an nih chhan chu, sipai sorkar dodalna lantirnaa an tel ve chhan chu pawn lama nawrtu an neih vang chauh a nih vang niin a sawi.

February 1-a sipaiten civil sorkar thuneihna hnehchhuh a, ro an rel hnuah Myanmar ramah hian mipuiten sipaite chet danah lungawi lohna an la lantir chhunzawm reng a ni. Nawrh huaihawtte leh sipaite hi ṭum tam tak inbeiin, Assistance Association for Political Prisoners chuan nawrhnaa tel zinga mi 5,200 chuang chu sipaiten an hreng mek a, hei bakah hian mi 2,000 lakah arrest warrant tihchhuah a ni tawh bawk niin a tarlang.