Brazil-in Covaxin dose mtd 200 a lei tum ṭhulh rih dawn

Brazil sorkarin India rama Covid-19 vaccine siam, Covaxin dose maktaduai 200 lei a tum chu sawiselna nasa tak a awm hnuin a ṭhulh rih dawn

Bharat Biotech siam, Covaxin leina tura USD maktaduai 324 hu inremna an siam danah thil fel tawk lo a awm niin sawisel a tawk nasa hle a, hei vang hian vaccine lei tum ṭhulh a ni rih dawn tih health minister Marcelo Queiroga chuan a sawi. Thil dik tawk lo awm nia sawi pawh chhuichian a nih tur thu a sawi bawk.

Health Ministry chuan thuchhuah siamin, "Contract ziah hi zirchianna hmasaah chuan fel hlel a awm hriat a ni lo a, mahse sawiselna a awm avangin Health Ministry chuan tihtawp rih a, chiang zawka zir leh phawt a tum a ni," a ti.

Vaccine leina tura inremna siam chungchang Brazil federal prosecutor-te pawhin an chhui a, February thlaa inremna an siamah hian vaccine man hi a sang lutuk a, hei bakah hian inremna hi an siam awlsam lutuk niin an lo sawi tawh a ni. He contract hi Senate panel pawhin a chhui chiang mek bawk.

Vaccine siamtu, Bharat Biotech chuan Brazil sorkar aṭangin vaccine man tur advance-in engmah an la dawng lo tih a sawi a, contract ziak tur leh regulatory pawmpuina hmu tur hian a tahtawl te tea kalin, thla 8 chhung hun an hmang niin a sawi thung. Ram dang nena contract an siamte chu ang khat veka siam a nih thu a sawi bawk. India ram pawna vaccine thawnchhuah turte chu dose khat USD 15-20 man ani dawn tih pawh chiang takin an sawilawk tih a sawi.