Malaysia lal-in special Parliament session ko turin ngen

Malaysia lal, King Al-Sultan Abdullah chuan Parliament in hniha speaker-te hnenah August 1 hma ngeia special parliament session ko turin a ngen.

Coronavirus hri leng leh hri kai an pun zel avangin Malaysia ramah hian lockdown puan chhunzawm a la ni.

King Abdullah hian a hma pawhin hri lengin harsatna a thlen dan leh, an ram economy a nghawng dan te, hemi kawnga sorkar hma lak dante sawiho turin Parliament session a rang thei anga neih a ṭul thu a lo sawi tawh bawk.

Parliament lower leh upper house-a speaker-te chuan thuchhuah inṭawm siamin, national palace-a meeting an neihah King Abdullah hian ngenna a siam tih an sawi. Lal ngenna siam hi prime minister hnenah pawh hriattir a nih thu an sawi.

Prime minister Muhyiddin Yassin chuan hri pui leng vangin Parliament session chu a hma berah September thlaah an nei thei chauh dawn niin a lo sawi tawh a, mashe an ram lalin ngenna a siam tak avangin special session hi an neih thuai rin a ni.

Malaysia ramah hian nimin thleng khan Covid-19 hri kai hmuhchhuah hi mi 7,51,979 an awm tawh a, an zinga 5,000 chuangin an thihpui tawh bawk.