Germany sipaiten Afghanistan chhuahsan fel ta

Afghanistan ram aṭangin Thawhlehni khan Germany sipaite an chhuah kim ta. Germany hian kum 20 dawn chu firfiakte do letnaa Afghanistan security force-te pui turin a sipaite hi a dah a ni.

Germany defence minister Annegret Kramp-Karrenbauer chuan Thawhlehni zanah Germany sipaite chuan Afghanistan an chhuahsan kim ta tih sawiin, kum 2001 aṭang khan sipai 1,50,000 chuang zet an lo awm tawh tih sawiin, mission zawhfela ni ta chu anni pawhin an chhuang hlea a rin thu a sawi.

Kumin April thla khan NATO chuan US President Joe Biden-an Afghanistan aṭanga America sipaite lakchhuah vek a tum hnuah, non-American sipai 7,000 awmte pawh lakchhuah a remti ve nghal a ni. He thutlukna siam lai hian Afghanistan-ah hian Germany sipai 1,100 vel an la awm a ni.

NATO hnuaiah Germany sipaite hi Afghanistan hmarlamah dah an ni a, Resolute Support mission hnuaiah US dawtah sipai awm tam berna niin, Mazar-e-Sharif leh Kabul-ah hmunpui an nei.

Germany Parliament chuan kum 2001, December thla khan Afghanistan-a sipai tirh hi a remti a, kum 2002, January thlaah a batch hmasa ber chuan Kabul a thleng a ni. Kum 20 dawn an awm hnuah a sipaite hi a lachhuak leh ta a, Afghan mission-a kal Germany sipai 59 an thi hman a ni. Sipaite hmanrua hi motor 120 leh helicopter paruk hmangin Germany-ah an phur haw nghal bawk a ni.

US pawhin America sipaite chu Aghanistan aṭangin July 4-ah lakchhuah fel hman a tum thu a lo sawi tawh. Mahse sipaite lakchhuah kim vek an ni dawn lo thung a, Kabul-a US embassy leh airport venna kawnga pui turin America sipai 1,000 chu an la chambang dawn niin official chuan a sawi. Afghanistan-ah hian US sipai hi 2,500 vel an la awm a, anni bakah additional special force eng emaw zat dah a ni bawk. Sipaite motor leh ralthuam ṭhenkhat chu thawn haw a ni tawh a, hmanrua ṭhenkhat erawh chu Aghanistan force-te hnenah hlanchhawn a ni. Kabul hmar lama US sipaite hmunpui, Bagram air base pawh Afghanistan sorkar hnenah hlan a ni ang.