WHO-in Malaria hri laka fihlim ramah China a puang
China chu malaria laka fihlim ramah World Health Organisation chuan Nilaini khan a puang. China chuan thosi aṭanga inkaichhawn, malaria hri umbo tuma kum 70 chuang a beih hnuah a hlawhtling ta a ni.
China-ah hian kum 1940 chho khan kumtin mi maktaduai 30 vel chu malaria vang hian an thi a, mahse kum li kalta aṭang khan he hri hi ram chhung aṭanga kai hmuh tur an awm tawh lo a ni.
"Malaria hri an umbo theih tak avangin China mipuite kan lawmpui hle a ni, " tiin WHO director-genreal Tedros Adhanom Ghebreyeus chuan a sawi. "Theihtawpa an beihna hmangin hlawhtlinna an sual chhuak a, kum tak chhung awmze nei taka hma an lakna vang chauha thleng thei a ni. China chuan malaria hri laka fihlim ram dangte rawn zawmin, malaria hi do hneh theih a ni tih an lantir a ni," a ti.
Kum thum chhung a zawna malaria vei hmuhchhuah awm lohna ramte hian WHO hnen aṭangin malaria free status an dil thei a, malaria vei an awm lo tih lantirna leh vei thar awm thei laka invenna an kalpui dan te an tarlang tur a ni.
China hi WHO hnuaia certified malaria free territory 40-na chiah a ni. Tun hnaiah El Salvador (2021), Algeria leh Argentina (2019), Paraguay leh Uzbekistan (2018) te malaria hri laka fihlimah puan an lo ni tawh bawk.
WHO-in a puan ni lo zingah hian malaria vei awm miah lohna emaw, a chhan ber hriat loha he hri bo takna ram 61 chhinchhiah an awm bawk a ni.
China hi kum 30 chuang hnua WHO hnuaia Western Pacific region huamchhunga malaria-free certification dawng leh thei hmasa ber a ni. Australia (1981), Singapore (1982) leh Brunei (1987) te chiah hian an la dawng a ni.
WHO in World Malaria Report 2020-a tarlan danin khawvel pumah malaria vei hi an tlahniam mawh hle a, a bikin Africa ram zingah vei leh thihpui an tam ṭhin hle.
Annual report November 2020-a tihchhuahah kum 2000 khan khawvelah malaria hri thihpui 7,36,000 aṭangin 2018 khan 4,11,000-ah tla thla tawhin, 2019 khan malaria vangin 4,09,000 an thi bawk a ni.
Khawvel puma kum 2019-a malaria vanga thi zinga 90% chuang chu Africa rama mi an ni a, thi zinga 2,65,000 chuang chu naupang an ni.
Kum 2019 khan malaria vei maktaduai 229 vel awm anga chhut a ni a, kum li chhung chu he hri vei hi an pun belh lo a ni.