China Communist Party kum 100 tlin lawm

China rama rorellai, Communist Party kum 100 tlin lawmna chu nimin aṭang khan neih a ni. A lawmna khuhhawnna hi Beijing-a Tiananmen Square-ah ropui takin neih a ni.

Tiananmen Square-a mipui ṭhahnem tak pungkhawmte hmaah aircraft 30 rual chuan kum 100 tlin lawmna pualin vanah '100' an siam a, president Xi Jinping leh ram hruaitu rualin he hun hi an hmanpui. Xi chuan an ramin mipuite khawsak awlsam theih nana centenary goal an siam chu an tihlawhtling tih a sawi.

Mao Zedong hnua China ram hruaitu chak leh thiltithei bera an ngaih, Xi Jinping chuan kum 100 chhunga an party tum bulpui ber chu an ram siamthar leh a nih thu sawiin, "China mipuite chuan khawvel hlui tihchhiat chauh ni lo, khawvel thar siam pawh an thiam a ni. Socialism chiahin China a chhanhim thei ang," a ti.

Kum 1949-a Mao hnuaia din, Chinese Communist Party hian a tirah chuan thingtlang hnathawk leh inhlawhfate a lakhawm a, mahse ṭhang chho zelin an ram market leh sumdawnna lamah "socialism with Chinese characteristics" tih thupuiah hmangin ṭan an la chho a ni. Kum 1949 khan Mao kaihhruaina hnuaiah thuneihna an chang thei ta a ni.

Kum 2020 chhung khan party mi maktaduai 2.43 in an zawm thar a, kum 2013-a Xi president atana an lakluh hnua kum khat chhunga member an pun nasat ber ṭum a ni. Nilainia data tihchhuahah Communist Party-ah hian member maktaduai 95.15 an awm mek a ni.

Xi chuan China mipui leh an party ṭhenhran tuma beihnate chu engtikah mah a hlawhtling dawn lo tih sawiin, "Kan party member maktaduai 95 leh China mipui tluklehdingawn 1.4 te chuan he thil hi a thlen an phal dawn lo," tiin a sawi.