Bangladesh-in khawpui chhungah sipai duty tir

Bangladesh-ah chuan Covid-19 hri kai an pun zel avangin nimin aṭang khan ni sarih chhung atan lockdown puan a ni. Lockdown puan chhung hian sipaite chu khaw chhungah duty tir an ni.

Lockdown puan chhung hian emergency service tih loh chu kalpui phal a ni lo a, sorkar office leh transportation pawh khar vek a ni. Emergency tih loha chhuakte veng turin sipaite hi an duty a ni. Dhaka police hotu, Shafiqul Islam chuan pawn chhuak luite chu pawisa chawitir bakah man theih an ni dawn tih sawiin, "Ni khata mi 5,000 chuang man an ṭul a nih pawhin kan man zel ang," a ti.

Tun hnaiah Bangladesh-ah hian hri kai thar an pung chak hle a, sorkar chuan hri kai pun chakna chhan hi Delta variant vang niin a sawi. Hri kai hmuh chhuah tawh hi mi nuai kua dawn an tling tawh a, mi 14,500 velin an thihpui tawh bawk.