Indonesia-a Java leh Bali-ah lockdown puang

Indonesia rama thliarkar lian ber Java leh khualzinte tlawh nasat, Bali-ah Covid-19 kai thar an pun zel vangin kar hnih chhung lockdown puan a ni. Indonesia-ah hian chawlh hmanga zin an tam chhoh leh tak avang leh Delta variant vangin Covid kai an pung chak hle a, hri kai hmuh chhuah hi maktaduai hnih chuang an awm tawh a ni.

Nilaini khan hri kai thar 20,000 chuang an awm belh leh a, mi 467-in an thihpui bawk tih official thuchhuak chuan a tarlang.

Mithiamte chuan Jakarta pawn lama test an kalpui ṭhat loh avangin hri kai hi an pun zel an ring a ni.

South East Asia ram zingah Indonesia hian hri leng hi a tuar na ber a, positive case maktaduai 2.1 awm tawhin hri vanga thi 57,000 an awm tawh.

International Federation of Red Cross leh Red Crescent Societies chuan Thawhlehni khan Indonesia ram chu Covid-19 vanga chhiatna rapthlak thleng mai thei dinhmunah an ding tih an sawi.

Indonesian Red Cross secretary-general Sudirman chuan "Damdawi-in khum te chu luahkhat vek an ni tawh a, oxygen supply pawh kan nei chau hle. Bogor, West Java-a damdawi-inah khum awl a awm tawh lo a, enkawlna ṭha dawn beiseia hmun hla tak aṭanga rawn zin te leh mi tam zawk kan khunglen theih nan damdawi-inah hian emergency tent kan siam a ni" a ti.

May thla tawp lama Java-a Kudus biala hri kai thar zingah hri inkaichhawn awlsam tak Delta variant hmuhchhuah an tam avangin hlauhthawnna a lian tawh hle.

Tualchhunga thuneitute chuan vaccine la tawh health worker 350 te chuan Covid an kai tih an sawi. Indonesian Medical Association tarlan danin Covid-19 vang hian health worker 949 an thi tawh bawk. Data-a a landanin thi zinga doctor 20 leh nurse 10 te chuan Sinovac vaccine siam, CoronaVac dose kimin an la tawh a ni.

Indonesia ram hian China vaccine siam a ring ber a, tunkar aṭangin vaccine pek chhuah hi chak zawkin a kalpui chho a ni. Hetih lai hian ram mpui maktaduai 270 zinga maktaduai 13 vel chauhin vaccine an la la a ni.