UN-in Suu Kyi chhuah turin Myanmar sipaite ngen

UN Secretary-General Antonio Guterres chuan Myamnar sipai sorkar hnenah civil sorkar an paihthlak taka hruaitu, Aung San Suu Kyi leh president Win Myint-te chhuah turin a ngen.

Myanmar sipaite hian thla nga liam taa civil sorkar thuneihna an hnehchhuh avanga lungawi lohna lantirtu an man zinga sang tel chu an chhuah zalen a, hemi hnu hian UN hotu hian hruaitu pahnih an hren mekte hi chhuah turin a ngen zui ve leh nghal a ni.

February 1-a civil sorkar paihthlaa sipai sorkar a din hnuah Myanmar ramah hian tualchhung buaina a thleng chhunzawm reng a ni.

"Finfiahna leh puhna dik lo avanga man takte, President Win Myint leh State councilor Aung San Suu Kyi-te chhuah zalen ve nghal turin kan ngen a ni," tiin Guterres-a associate spokesperson, Eri Kaneko chuan Ningani khan a sawi.

Myanmar sipai sorkar hian Nilaini khan tanin aṭangin mi 2,000 chuang an chhuahtir a, an zingah hian journalist leh sipai laka lungawi lohna lantirnaa telte pawh an tel tih tualchhung media te chuan an puang.

Hetih lai hian sipai sorkar duh lohna lantirtu zinga mi tam tak chu hren beh an la ni a, ṭhenkhat chu sipaite chungchangah thu dik lo thehdarha puhin thiam loh chantir pawh an awm. Suu Kyi pawh hi thubuai eng emaw zat siamsak a ni tawh a, a thubuaite hi ngaihtuah mek a ni.

Sipaiten civil sorkar an paihthlak thla ngana champha, Ningani khan ramchhunga khawpui lian ber Yangon-ah mipui lungawi lo mi za tel an pungkhawm leh, sipai uniform-te halin an rama democracy tundin an duh thute an aupui.

Myanmar-ah hian sipai laka lungawi lohna hi nitinin huaihawt ṭhin mah se, Ningania Yangon khawpuia nawrh huaihawt hi tunhnai chhoa an tam ber ṭum a la ni. "Enge kan duh? Democracy! Democracy!" leh "Mipui tan! Mipui tan!" tiin pungkhawmte chu an aurual a ni.

Sipaite hian ram rorelna kawngah an thuneihna lekkawh an la harsat hle thung a, mipuite nawrh an huaihawt reng vangin public leh private sector-te chu hnathawk mumal thei loin an siam, hei bakah hian ramri lamah hel pawlte nen an buai fo bawk. Sipai hotute chuan anmahni beitute chu firfiakah an puang. .

Assistance Association for Political Prisoners activist group chuan sipaite'n thuneihna an chan aṭangin mi 6,400 chuang an man tawh tih an sawi. Buaina chhuak vang hian mi 880 chuang an thi tawh bawk a, mahse sipaite chuan thi zat hi a nihna baka aia sawi uar ah an puh thung.