US sipaite'n Bagram Air Base chhuahsan

US leh NATO ṭangrual sipaite chuan kum 20 dawn hnuah Afghanistan-a Bagram Air Base chu nimin khan an chhuahsan fel ta.

Bagram air base hi Afghanistan khawpui, Kabul hmarlam km 50-a hlaa awm a ni.

Official chuan ram dang sipai awmten Bagram an chhuahsan kim tak thu hi sawiin, he air base hi engtikah nge Afghan sipaite kutah hlan a nih dawn erawh a sawilang lo.

Afghanistan-a US leh NATO sipai dahte hi kum 20 dawn hnuah September 11 hmaa lak chhuah fel hman turin hma lak mek a ni. US sipai hi 2,500-3,000 vel awmin, NATO sipai hi 7,000 vel an la awm.

Ram dang sipaite an inlakchhuah mek laiin, Aghanistan-a Taliban firfiak pawlte erawh thuneihna chan tumin an che na chho ṭan hle. Taliban-te hian tun hnaiah Aghanistan sipaite kut aṭangin an ram khawpuia hmun pawimawh leh district tam taka thuneihna chu an chhuhsak tawh a ni.

Afghan sipaite kutah Bagram airfield hi hlan a nih chuan Kabul khawpui venhimna pawh an kalpui ṭha thei dawn a, Taliban chetlakna an dang thei tura ngaih a ni. He airfield hi kum 1980 chhoa Soviet hoin an siam a ni a, kum 2001 khan US kaihhruai ṭangrual pawlte hian luah ṭanin,an tilian zui a, sipai 10,000 chuang an awm thei a ni.