Trump-a'n sipai tirh luhah vau

US-a police kuta mi hang pakhat a thih avanga buaina chhuak chuan zual lam a pan zel avangin president Donald Trump chuan buaina chhuak chingfel tura sipai tirh luhah a vau. 

President Trump chuan George Floyd thih dan chungchanga lungawi lohna lantira khawpui hrang hranga buaina chhuak chu thuneituten an khuahkhirh thei lo a nih chuan, sipaite tirin buaina hi a chinfel mai dawn tih a sawi. 

Missouri-a lungawi lohna lantirnaa buaina chhuakah police pali chu kah fuh niin hliam an tuar a ni. Buaina chhuah vang hian khawpui tam takah zan lama curfew puan a ni tawh bawk. 

White House-a thu a sawinaah Trump chuan, "Rawng taka George Floyd thah a nih dan chuan America mipui zawng zawnga  ti thinur vek a ni. Mahse amah hriatrengna hi mipui thinurin an duhdana dan lekkawh a, tharum thawhna thlenga buaina siamin kan luahlan tir tur a ni lo," a ti. 

Thawhṭanni khan White House bulah lungawi lohna lantirin mi eng emaw zat an pungkhawm a, heng mite hi tear gas leh rubber bullet hmanga hnawhdarh an ni. 

Mipui lungawi loten tharum thawhna thlen a, thil tichhiaa buaina an thlen chu thil zahthlak tak a ni tih sawiin, "Hetiang thil thleng tihtawpna tur hian ralthuam nena inthuamin sipai tam tham tak kan dah mai dawn a ni," tiin a sawi. An rama buaina chhuak chungchangah anti-fascist group Antita chu mawhphurtuah puhin, firfiak pawlah puan a tum thu a sawi bawk. 

United Nations secretary general Antonio Guterres pawhin George Floyd thih dana lungawi lohna lantirte chu tharum thawhna thlen zawnga che tawh lo turin a ngen. 

UN hotu chuan an lungawi lohna an lantir a nih pawhin, boruak ṭha hnuaiah, buaina siam lo zawnga ti turin a ngen. Police-ten tharum thawhna an thlen ṭhin chungchang pawh chhui chian a ngaih thu a sawi bawk a, US chauh ni lo khawvel pumah police-te chuan human rights training ṭha tak an neih a ngai a ni, a ti. 

Hemi rual hian khawtlang himna tura an hna ṭha taka an thawh theihna turin an tan investment tih a ngai a ni, a ti bawk.