Phillipines-ah sipai phurtu thlawhtheihna a tla

Philippines chhim lamah nimin khan sipai thlawhtheihna a tla a, mi 17 an thi.

C-130 Hercules transport aircraft-ah hian mi 92 an chuang a, a tam zawk chu sipai mi leh sa an ni. Sulu province-a Jolo Island-ah an ram huna chhun dar 11:30 vela a ṭum tum chu chesualin a kang zui ta niin defence secretary Deflin Lorenzana chuan a sawi.

Lorenzana chuan thlawh­theihna tlakna aṭang hian ruang 17 hmuh niin, midang 40-te chu chhanchhuah a ni a, mahse hliam an tuar avangin damdawin lam panpui nghal an ni tih a sawi. Midangte zawn mek an la ni tih a sawi bawk.

"Thlawhtheihna hi runway-ah a ṭum ṭhelh a, thunun hman lohin a chesual zui ta a ni. He thil thleng hi a pawi takzet a ni," tiin General Cirilito Sobejana chuan a sawi a, chin hriat loha la awmte pawh dam taka an chhanchhuah a beisei thu a sawi.

Sobejana chuan he thlawh­theihnaah hian chhim lam, Mindanoa thliarkara Oagayan de Oro-a sipaite a phur tih a sawi bawk. Heng sipaite hi an ram chhim lama Islam firfiak pawl, Abu Sayyaf group bei tura tirhte an ni a, a tam zawk hi basic military training zo hlim hlawl an ni.

C-130 thlawhtheihna hi sipai leh an mamawh dangte phurh leh thiarna atana hman bakah, chhiatna thlenna hmuna chhawmdawlna pekna atante hman a ni ṭhin a, Phillipines air force-ten thlawhtheihna an neih thar zinga mi a ni.

Sipai thupuangtu, Colonel Edgard Arevalo chuan thlawh­theihnaah hian beihna hnu hma engmah hmuh a ni lo tih a sawi a, hemi rual hian a chetsual dan uluk zawka chhui chianna erawh neih ṭan a ni lo a, chhanchhuah hna thawk leh hliam tuarte enkawl chu ngaih pawimawh hmasak phawt a ni, a ti.

June thla khan Philippines-ah hian Black Hawk helicopter zan lama training lai chu chesualin mi paruk an lo thi tawh bawk. S-70ipPilot pathum leh airmen pathum te hi Manila hmarlam, Crow valley bula training an neih laiin chesualin a hmunah an thi zui nghal a ni.