Brazil mipuiten President laka lungawi lohna lantir leh

Brazil mipuite chuan Inrinni liam ta khan an ram president Jair Bolsonaro laka lungawi lohna lantir leh a, bang tura an phut bakah Covid vaccine tam zawk pek chhuah an phut bawk.

Brazil ram Covid-19 hri leng tuar nasa ber ram zinga mi niin, US dawtah he hri vanga thi tamna ber ram a ni mek.

Supreme Court justice Ros Wber chuan India ram ṭanga Covid-19 vaccine, Covaxin lei tuma inremna siamah thil fel tawk lo a awm nia sawi chungchanga President Bolsonaro chu chhui chian a phalsak bawk. Sawiselna tam tak a awm avangin Brazil hian India Covid vaccine lei a tum hi a ṭhulh leh rih a ni.

Nawrh huaihawt hi a hma chuan July 24-a neih tuma ruahman a ni. Mahse sorkarin hri leng dona kawnga a hmalak dan leh, vaccine leina tura inremna a siam danah thil dik tawk lo a awm ngei tih finfiahna Senate committee hnenah pek a nih avangin Inrinni khan lungawi lohna hi an lantir leh ta zawk a ni. State capital 13 bakah khawpui lian dangahte nawrh hi huaihawt a ni.

Hetih lai hian Presi­dent Bolsonaro leh Covaxin siamtu, Bharat Biotech chuan inremna an siam chungchangah thil dik lo a awm lo niin an sawi thung.

Brazil ramah hian Covid-19 hri kai hmuh chhuah hi 1,87,42,025 an awm tawh a, hri kai tam lamah pathumna niin US leh India dawtah a awm. Hripui thihpui zat hi India aiin an tam thung a, mi 5,23,587-in an thihpui tawh.

Johns Hopkins Univer­sity-in a tarlan danin, nimin zing thleng khan khawvel pumah Covid-19 hri kai hi maktaduai 183.4 awm tawhin, mi maktaduai 3.96 in an thihpui tawh a ni.