Pakistan PM-in lockdown thlahdul chhan sawifiah

Pakistan prime minister Imran Khan chuan an rama Covid-19 kai an pun belh zel chunga inkharkhipna an siamte thlahdul a nih chhan sawifiahin, sorkarin sum tam tak a hloh tawh avangin an ram economy dinhmun an ngaihtuah vang tih a sawi. 

Pakistan-ah hian hri kai hi mi 72,000 chuang awm tawhin, he hri vanga thi hi mi 1,500 an chuang tawh bawk. Mahse heti chung hian sorkar chuan khuahkhirhna a siamte chu a hlip deuh vek tawh thung a ni.  

Imran Khan chuan inkharkhipna an kalpui avanga sorkarin a sum hmuh ṭhin aṭangin 30% vel zet a hloh tawh tih sawiin, hei hi a tlahniam zel dawn niin a sawi. An ram chuan a hma aṭangin sum lamah harsatna a tawk chho tawh a, hei vang hian ramdangte inkharkhipna an kalpui avanga sum tam tak an hloh phah ang chu anni tan chuan tih ve theih a ni dawn lo tih a sawi. 

PM chuan an ram mipui maktaduai 220 zinga maktaduai 50 chu mi rethei, below poverty line an nih thu leh, mi maktaduai 25 chu nitina inhlawhfaa eizawng an nih thu a sawi bawk. 

Sorkar chuan mi retheite chhawmdawlna tur pe tawh mah se hei hi a chhunzawm zel thei dawn lo tih a sawi. Hri leng chu a reh mai dawn lo a, thi pawh an la awm  belh zel dawn a ni tih sawiin, hemi rual hian fimkhur takin hri leng kara nun dan an zir chhoh a ngai tih a sawi.