July 1-ah Russia danpui siamṭhatna turin vote la dawn

Russia danpui siamṭhatna tura mipuite vote lak hun tur chu tihkhawtlai a nih hnuah, July 1 hian mipuite'n vote an thlak thei dawn tih president Vladimir Putin chuan a sawi.

Ruahmanna hmasaah chuan April 22 kha vote thlak hun tur a ni a, mahse Covid-19 hri leng vangin an sawn hla a ni. 

Russia Parliament-in danpui siamṭhatna tur a pawm hnuah, mipuite vote hi lak tum a ni a, Russia-ah hian hri leng hi a zual lai a pelh tawh avangin a hun tur hi sorkar lam chuan a ruatchiang ta a ni.

Putin chuan mipuite hriselna leh himna sorkar chuan a ngaihpawihmawh avanga vote lak hun tur hi sawn hlat a nih thu a sawi. "Ram chhunga hri leng chuan ziaawm lam a pan chho a, hri leng zual lai pawh kan pel tawh a ni. Nunphung pawh a pangngai chho vat dawn a ni," a ti.

Kum 20 lai chu Putin hian an ram president leh prime minister hna a lo chelh tawh a, Russia ram Danpui an hman mekah hian a zawnin term hnih ai tam president hna hi a chelh theih loh a ni. Chuvang chuan nikum kum tawp lam aṭanga a lo rawt tawh an ram danpui siamṭhat tumna hi a hlawhtlin a, thlan tlin a nih chhunzawm zel bawk chuan kum 2036 thleng president dinhmun a chelh thei dawn a ni.

Putin hi kum 1999-2008 khan president hna a chelh a, kum 2008-2012 thleng khan an ram prime minister hna a lo chelh tawh bawk a ni. Kum 2012 May 7 aṭang khan vawiin thlengin president hna hi a la chelh a, kum 2024-ah a term hi a tawp ang.