Iran-in an buainaah ramdangte inrawlhah puh

Iran-ah sorkar laka lungawilohna lantirin ṭum eng emaw zat kawngzawh huaihawt a ni tawh a, Iran sorkar chuan tualchhung buaina an tawh chungchangah ramdang, an hmelmate inrawlhah a puh.

Nikum December 28 aṭang khan Iran sorkar duhlohna lantir hian kawngzawh huaihawt ṭan a ni a, ṭum 20 zet nawrh huaihawt a ni tawh. Lungawi lohna lantir a nih hnua buaina chhuakah mi 22 an thi tawh a ni.

Iran ram hotu lu ber, Ayatollah Ali Khamenei chuan Iran ram hmelmate chu tualchhung buaina chawk chhuak tur hian hmanraw hrang hrang hmangin an mite an fuih niin a puh a, pawisa, ralthuam, politics leh intelligence service-te chu an ram chawhbuai nan hmanruaah an hmang a ni, a ti.

Hetihlai hian US President Donald Trump chuan nawrh huaihawttute chu Iran sorkar rawng tak leh hlemhle tak laka an lungawi lohna an lantir ngam avangin a fak thu a sawi a, Iran mipuite chuan ei tur an hnianghnar loh laiin thil man a sang chak a, an ramah human rights palzut a ni bawk niin a sawi. Hei hi Iran foreign ministry chuan a chhang let nghal a, US President chuan thil awmze nei lo leh midangte deusawhna atan a hun a seng thlawn mai mai niin a sawi a, US-a mi rethei leh chenna nei lote buaipuia a hun hmang zawk turin a ti ve thung a ni.