Ethiopia-in tangte ngaidam dawn

Ethiopia sorkar chuan politics avanga mante chu ngaihdam an ni dawn tih a sawi a, an ram khawpui Addis Ababa-a tan-in pawh khar a ni dawn tih a sawi bawk.

Ethiopia prime minister office chuan politician thubuai nei mekte pawh an thubuai tihtawp a ni dawn tih a sawi a, tan-ina tang mekte chu ngaidamin chhuah an ni dawn a ni, a ti. Sorkar chuan Addis Ababa-a tanin hmingchhe tawk, Maekelawi detention centre pawh khar a nih tur thu a sawi a, he hmuna police duty-te chu mitangte thu an zawhfiahnaah an che rawng thei hle a, innghaisak pawh a thleng fo ṭhin niin Human Rights Watch chuan a lo sawi tawh a ni. Maekelawi detention centre hi khar a nih hnuah sorkar chuan museum atana siam a tum nia sawi a ni.

Ethiopia-ah hian politics vanga tang an tam hle a, sorkarin a ngaihdam tur hian eng chin nge a huam dawn sawichian a ni lo. Kum 2015-a Oromi miten sorkar laka lungawi lohna na lantir ṭum khan mi tam tak man a ni a, nawrh huaihawtte laka sipaite beihpui thlaknaah mi za tel thah an ni bawk. human rights group Amnesty International chuan Oromia biala sorkarin emergency a puan hnu khan mi 11,000 chuang man an ni a, heng mite hi ukil pawh pek a ni lo niin a tarlang.