Myanmar sipaite'n mi 25 kaphlum

Myanmar sipaite chuan Sagaing biala Depyaing khuaah kar liamta Zirtawpni khan sipai sorkar dodaltu pawl nena an inbeihnaah mi 25 an kaphlum niin Myanmar media-te chuan an sawi.

Hetih lai hian sipai sorkar enkawl, Global New Light of Myanmar chuan sipai sorkar dodaltute chu firfiak tia sawiin, an ni hian sipai patrolling hi lo lambunin, sipai pakhat kaphlumin mi dang paruk an kap hliam niin a tarlang. Sipaite hian bei letin, anmahni lo beitute hi an tlanchhe zui ta a ni, a ti.

Depayin khuaa cheng pakhat chuan Zirtawpni khan sipai motor paliin an khuaah sipai rual ṭhahnem tak an rawn dah tih a sawi. Heng sipaite hi civil sorkar paihthlak a nih hnuah sipai sorkar dodaltuten an din, People's Defence Force mi leh sate chuan an lo bei a, mahse ralthuam an neih ṭhat tawk loh avangin ralthuam nei ṭha zawk, sipate hian an nawr let a ni. "Huan leh rel kawngah te mitthi hmuh tur an awm. Sipaite hian thil che tawh phawt chu an kap vek mai a ni," tiin mita hmutu pakhat chuan a sawi. Mitthi ruang 25 te chu inbeihna zawh hnu hian hmuh an ni.

BBC Burmese service website leh Than Lwin Khet News service-te pawhin he thil thleng hi an puang a, Myanmar Now news service chuan inbeihnaa thi hi mi 31 aia tlem lo niin, mi 10,000 chuang chu hmun him lamah an tlanchhia niin a tarlang.

Depayin Peoples Defence Force chuan an Facebook page-ah an member 18 te an thih thu leh mi 11 te'n hliam an tuar thu an tarlang ve bawk.

Civil sorkar paihthlak anih aṭanga buaina kal zelah ram mipui 2,30,000 chuangin an chenna chhuahsan tawhin, mi 880 chuang chu sipai kutah an thi tawh a, mi 5,200 chuang chu hren mek an ni tih United Nations chuan a sawi.

Tualchhung buaina chhuak mek karah Myanmar ramah Pathianni khan Covid-19 kai thar 2,318 an awm belh leh. Doctor leh health worker-te'n sipai sorkar duh lohna lantira hna an thawh mumal loh aṭangin an ram health system hian a tuar hman hle a ni.