Indonesia-ah hri lengin zual lam pan zel

Indonesia ramah Covid-19 hri lengin zual lam a pan zel a, hri kai enkawl ngai an pun chak avangin khawpui hrang hranga damdawi-inah oxygen indaih lohna an tawk mek.

Hospital hrang hrang chuan oxygen supply an tlachham ṭan tih sawiin, damdawi-in pakhatah chuan oxygen indaih loh vangin damlo 63 an thi.

Indonesia ramah hian tun hnaiah nitin hri kai thar hi 25,000 chuang an awm chho reng a ni. Hri kai hmuhchhuah tawh hi mi maktaduai 2.3 tling tawhin, an zinga 60,000 chuangin an thihpui tawh bawk.

Nimin khan Bandung khawpuia hospital pahnih chuan oxygen an neih tawh loh vangin emergency treatment pawh an la thei tawh lo tih an sawi. Bandung bakah Surakarta leh Pamekasan khuaa damdawi-inte chuan oxygen indaih lohna avangin harsatna an tawk mek a, dam lo an admit theih tawh loh avangin damdawi-in bulah mi ṭhenkhat chuan puan-in te an kaih a ni.

Sorkar chuan an ram chhunga gas industry-te chu medical oxygen tam zawk siam turin a ngen tawh bawk.

Medical frontline worker-te chu Covid-19 vaccine pek vek ni tawh mah se an zingah hri kai leh thihpui pawh an pung chak hle.

Indonesia hian China Covid-19 vaccine siam, Sinovac chu an hmang a, mahse vaccine la tawh zinga hri kai an la pun zel avang leh, Delta variant laka invenna atan expert-te chuan vaccine hi dose thumna thlenga pek an ngaihtuah mek.