Queen Elizabeth-in health worker-te chawimawina hlan dawn

Britain lal, Queen Elizabeth II chuan UK sorkar hnuaia National Health Service (NHS) chu hri leng kara an hnathawh ṭhat leh health worker-te inpekna ropui tak avangin an ramin civil chawimawina a pek san theih ber, George Cross award a hlan dawn.

Civil mite hnena pek, George Cross award hi sipai huaisen leh thawk ṭha te'na an dawn ṭhin Victoria Cross nen a in tluk a ni.

Kum 95 mi, Queen chuan,"He chawimawina hi NHS staff zawng zawng, tunhma lama lo thawk tawhte leh tuna thawk mekte hnathawh kan ngaihhlutzia a lantir a ni. Kum 70 chuang chu huaisen takin, phur tak leh inpe takin kan ram mipuite an lo enkawl tawh a ni," tiin an inpekna chu UK mipuite chuan a ngaihluin an lawm takzet tih a sawi.

April thlaa Covid-19 vanga damdawi-ina enkawl, prime minister Boris Johnson pawhin NHS staff-te huaisenna chu mit ngeia a hmuh thu hi sawiin, health service-a hnathawkte tel lo chuan tun dinhmun hi an thleng thei dawn lo tih a sawi.