North Korea Winter Olympics-ah tel ve dawn

North Korean Olympic official chuan thla lehah South Korea-a Winter Olympic Games neih turah an ram chu a tel ve dawn niin a sawi.

International Olympic Committee-a NKorea palai, Chang Un chuan he thu hi Inrinni khan chanchin thar lakhawmtute hmaah a sawia, Switzerland-ah kalin hemi chungchang hi thuneitute a sawipui dawn niin Japan news agency Kyodo chuan a tarlang. NKorea hian South Korea nena official talk neih pawh alo remti tawh bawk a ni. Hei hi kum hnih hnua Korea ram pahnihten official-a inbiakna an neih leh hmasa ber tur a ni a, ramri bul demilitarized zone (DMZ)-a Panmunjom khuaah inbiakna hi neih a ni ang.

US President Donald Trump chuan Korea ram pahnihten inbiakna an neih tur chu a thlawp thu a sawi a, hei bakah hian NKorea hotu, Kim Jong-un nena inbiakna neih a duh thu a sawi bawk. Trump chuan Kim nen hian telephone-a an inbe thei a nih chuan a tih ngei tur thu leh, harsatna a neih loh thu a sawi a, inbiakna hmanga an buaina pawh chinfel theih a nih a rin thu a sawi bawk.