Israel-in pawl 20 luh a khap

Isreal sorkar chuan international group 20 te chu an member-ten Boycott, Divestment and Sanctions (BDS) movement an thlawp avangin an rama luh a khap.

Pathianni khan Israel strategic affairs ministry chuan blacklist hi a tichhuak a, an zingah hian a tam zawk hi Europe rama hmunpui nei niin, US, Chile leh South Africa-a hmunpui neite an tel bawk.

BDS movement hi Palestinian kaihhruaia Israel-in Palestinian ram a luahsak duh lohna lantira non-violent campaign a ni a, kum sawm chuang liamtaa neih ṭan a ni. He movement hian Palestinian-te chu angkhata en turin Israel sorkar a nawr a, kawngpui dan leh kawng dangtein sorkar hi an nawr ṭhin a ni.

Israel sorkar chuan he movement tihtawp tum hian a bei fo a, kum 2017 March thla khan Israel thuneituten Israel policy dodaltu activist-te Israel rama luh bakah, Palestinian ram a luah West Bank-a luh an khapna thupek siam thei turin thuneihna pawh a lo pe tawh a ni.

Israel strategic affairs minister Gilad Erdan chuan list an siam thar chu Israel dodal zawnga che, pawl hrang hrangte hmehmit an tumna tura an hmalakna kawng khat a nih thu a sawi. Heng pawlten dik lo taka Israel an puhna leh, thu dik tawk lo an thehdarh ṭhin chu veng turin theihtawp a chhuah zel dawn tih a sawi.

Israel blacklist-a a telh pawl hrang hrangte chuan sorakar thiltih dan chu an sawisel a, ṭhenkhat erawh chuan BDS movement-in hnehna a chang ta tih a lantirna zawk niin an sawi. Blacklist-a tel zinga mi, Friends of Al Aqsa (FOA)-a public affairs hotu, Shamiul Joarder chuan list siam a ni ta chuan BDS chuan a takin hna a thawk tih a entir a ni, a ti.

Strategic affairs ministry thupuangtu chuan khapna hian heng pawl member zawng zawngte chu a huam tel vek kher lo tih a sawi a, mahse member zinga Israel rama kal tum an awm chuan a mimala ngaihtuah vek an ni dawn niin a sawi. Khap bikte chu Israel sorkar boycott a, sorkar hmalakna dodal leh duh lohna lantir zawnga che leh, hemi kawnga midangte kaihruaitute an ni, a ti.