Iran president hlui man

Iran president hlui Mahmoud Ahmadinejad chu December 28 aṭanga Iran khawpui hrang hranga sorkar laka lungawi lohna lantira nawrh huaihawt chungchangah mipuite fuihpawrh leh mawhphurtua puhin man a ni.

Mahmoud Ahmadinejad hian kar hmasaa Bushehr khuaa nawrh huaihawtnaah thu sawiin, Iran sorkar inrelbawl dan dik loh thu leh, sorkarin mipuite a hlamchhiah thute a sawi a ni. Ahmadinejad chuan an ram hruaitu tam tak chuan an harsatna tawh mek chu hriat pawh an hriatpui lo a, mipuite manganna chu an ngaihven lo niin a sawi. Hemi hnu hian president hlui hi man a ni a, house arrest-a hren zui a nih rin a ni. Ahmadenijad bakah Shiite hruaitu leh politician Mehdi Karroubi leh prime minister hlui Mir-Hossein Mousavi te pawh man an ni bawk.