March-ah Egypt President thlang dawn

Egypt National Election Authority (NEA) chuan an ram president thlanna neih hun atana March 26-28 ruat a nih thu a puang.

NEA hotu Lashin Ibrahim chuan president thlanna neih tura chuh tumte tan January 20 atangin candidate registration tih ṭan theih a ni ang a, January 29-ah khar a nih tur thu a sawi. Election campaign hi February 22 aṭangin neih ṭan a ni ang.

Ibrahim chuan inthlanah hian candidate zingah tling zo an awm lo a nih chuan, inthlan thawh hnihna chu April 24-26 chhungin neih a ni ang, a ti. Inthlan thawh khatna atan hian Egypt mi, ram pawn lama awmte chuan March 16-18 chhungin vote an thlak thei ang a, inthlan thawh hnihna atan hian ram pawn lamah chuan April 19-21 chhungin vote thlak theih a ni bawk ang. Result hi May 1-ah puan a ni ang.

Egypt President Abdel Fattah al-Sisi chuan inthlan hi a chuh dawn leh dawn loh a la puang lo a, mahse a chuh ngei rin a nih bakah, hneh taka thlan tlin a nih rin a ni bawk. Sisi-a lamṭangte chuan nikum December thla khan Egypt mi zingah president atana Sisi-a ni chhunzawm leh tura duhtu signature maktaduai 12 chuang an lakhawm a, hehi an ram mipui awmzat aṭanga 11% chuang a tling.

Opposition lawyer Khaled Ali chuan president thlanna neih turah a chuh tur thu a puang tawh a, Air Force Commander hlui leh Prime Minister hlui Ahmed Shafiq chuan chuh a tum thu a puan hnuah, Pathianni khan a sut leh a ni.