US-in Salvador mi 200,000 te chhuah tir dawn
US President Donald Trump-a kaihhruai sorkar chuan an rama El Salvador ram mi 200,000 te awm phalna a pek chu tihtawp a tum.
El Salvador mite hi kum 2001-a an rama lirnghing nasa tak a thlen hnu khan US chuan an rama awm phalna, Temporary Protected Status (TPS) a pe a, mahse he phalna a pek hi tihtawp a tum ta a ni. Salvador mite chu kum 2019 September 9 thleng US chhuahsan turin hun pek an ni a, hemi hun chhunga chhuak lote chu thawn haw an ni ang.
Haiti leh Nicaragua mite hnena PTS pek pawh tihtawp sak an ni tawh bawk.
US sorkar hian thla li liamta khan naupang an nih laia an rama lutte humhalhna, Barack Obama hun laia siam, Daca (Deferred Action for Childhool Arrivals) chu tihtawp a tum thu a lo puang tawh bawk a, Daca chungchanga thutlukna siam tur hian Congress chu March thla thleng hun pek an ni. He thutlukna hian naupan laia US-a pem lut, Dreamers tia sawi mi nuai riat vel zet a nghawng dawn a ni.
Center for Migration Studies-in a tarlan danin, Salvador mi US chhuahsan tura tih zingah hian in leh lo nei mi 135,000 zet an awm a, an fate zinga US-a piang mi tam tak an awm bawk a ni. Salvador mi tam zawk hi California, Texas leh Washington DC-ah an khawsa a ni.
EL Salvador sorkar chuan US-a an mi awmte humhalhna pek chhunzawm zel a nih theih nan US sorkar an ngen mek tih a sawi a, Foreign Minister Hugo Matinez chuan US-a hnathawk mek, Salvador mite buaina chinfel dan ngaihtuah turin President Trump-a sorkar chu an thawhpui tur thu a sawi.