US-a Covid-19 vanga thi 99% ten vaccine la lo

America rama disease expert lar, Dr Anthony Fauci chuan tun hnaia United States-a Covid-19 vanga thi zinga 99% te chu vaccine la lo an nih thu a sawi.

Dr Fauci chuan June thla chhunga US-a Covid kaihhnawih vanga thi 99.2% te chuan vaccine an la ve lo nia sawiin, "Heng thihna thleng tam zawk hi chu pumpelh theih a nih avangin a lungchhiatthlakin a vanduaithlak takzet a ni" a ti.

National Institute of Allergy and Infectious Diseases director Dr Fauci hian vaccine dose hnih a lak tawh thu a sawi a, mahse hetichung hian vaccine semchhuah ṭhat lohna leh coronavirus hri kai tamna ramah a zin dawn chuan mask a vuah ngei tur thu a sawi.

COVID-19 Response Team leh Public Health Official-te'n White House-a press mite hmaa thu an sawi ṭum pawhin Dr Fauci hian hri laka invenna ṭha ber chu vaccine dose kima lak a nih thu a lo sawi tawh bawk.

Dr Rochelle Walensky, Director of the Centers for Disease Control chuan India rama hmuhchhuah, Delta variant chu United States-a variant hmuh tam ber dawttu a nih thu a sawi. "Ramchhunga SARS-CoV-2 hmuhchhuah tawh zinga 25% chu Delta variant an ni a, hmun ṭhenkhatah phei chuan hri kai pahnih zela pakhat zawkin Delta variant an kai tawh a ni," tiin Walensky chuan a sawi.

Tun thleng hian America mipui zinga maktaduai 180 chuangin coronavirus vaccine dose khatna an la tawh. United States hi khawvel ram zinga hri leng tuar na ber an ni a, hri kai vaibelchhe 3.3 awm tawhin mi nuai ruk chuang an thi tawh bawk a ni.