July 19 aṭangin UK-in khuahkhirhna thlahdul dawn

Britain prime minister Boris Johnson chuan Thawhṭanni khan Covid-19 vanga khawsakna leh ei bar zawnna kawnga England-a khuahkhirhna an siamte chu kar hnih chhunga tihtawp vek turin ruahmanna a siam.

Sorkar chuan July 19-ah khuahkhirhna te tihtawp vek a tum tih PM Johnson chuan a sawi, karlehah thuthlukna hi an siam dawn tih a sawi a ni. Ruahmanna siam tharah hian inhlata awm tura thupek siam te, in lam aṭanga hna thawh leh pawn chhuahnaa face mask vuahna thupekte chu tihbo a ni tawh ang.

Novel Coronavirus vanga Indopui pahnihna hnua Britain ram chanchina khuahkhirhna khauh berte zinga mi an siam hnuah, vaccine semchhuah vanga hri kai an tlakhniam mai bakah damdawi-in panpui ngai an tlem tak avangin vaccination programme chungah hian rinna thuktak an nghat tih Johnson chuan a sawi.

Nightclub-te chu hawn phalsak an ni tawh dawn a, punkhawmnaah awm thei chin bithliah pawh siam ni tawh loin, social distancing guidelines pawh paih vek an ni ang.

"Inkhuahkhirhna dan siamte kan hlip ang a, mipuite chu hri leng do kawnga an duh ang thutlukna an siam kan phalsak dawn a ni," tiin Johnson chuan England-a health policy an siam dan te a puang. Hei hian Scotland, Wales leh Northern Ireland a huam lo ang.

Britain hi Covid-19 vanga thi tam lamah pasarihna an ni a, England-a lockdown vawi thum puan tawhah hma la muang lutukah puhin Johnson hian sawiselna a tawk fo a ni. Mahse Britain hian chak takin vaccine an semchhuak reng a, puitling zingah 86% chuan vaccine dose khatna an lak tawh laiin, dose kima la tawh hi 64% an tling tawh tih sorkar thuchhuak chuan a tarlang.

Public Health England tarlan danin vaccine dose hnih lak hnu hian Delta variant vanga natna khirh zawk leh damdawi-in panpui ngai an tlem phah tih an tarlang.

Johnson chuan kum 40 hnuailam tan, Covid-19 vaccine dose khatna an lak aṭanga kar 12 hnua dose hnihna lak tura tih chu kar riatah tihtawi a ni tih a sawi.

Johnson chuan khuahkhirhna siamte tihtawp hun ṭha a ni chho nia a ngaih rualin, mipuite chu fimkhur chhunzawm zel turin a chah a, a ṭul a nih chuan inkhuahkhirhnate hi kalpui leh a ni ang, a ti.

"Hri leng tawpna anga lo ngai mai lo turin mipuite ka ngen duh a ni. Variant thar kan hmu leh a ,vaccine in hna a thawk thei lo emaw a nih palh chuan mipui venhimna kawng awm ang ang te kan zawn leh mai a ngai dawn a ni" tiin Johnson chuan a sawi.

Opposition Labour Party leader Keir Starmer erawh chuan ruahmanna tharte hi sawiselin, "Venhimna zawng zawng hlih vek ringawt hian hri kai nasa zawkin an punbelh thei a ni", a ti. Mask vuah tihtawp chu ṭha lo tiin, a bikin public transport-ah vuah a la ṭul thute a sawi a ni.